Nobel Prizes 2022 Medicine: स्वीडनच्या स्वांते पाबो यांना वैद्यकशास्त्रातील नोबेल पुरस्कार जाहीर!

Nobel Prizes 2022 Medicine: जगातील सर्वात प्रतिष्ठित पुरस्कारांपैकी मानला जाणारा नोबेल पुरस्कार (Nobel Prizes) जाहीर झाला आहे. यंदा स्वीडनच्या स्वांते पाबो (Svante Pääbo) यांना फिजिओलॉजी किंवा वैद्यकशास्त्रातील नोबेल पारितोषिक घोषित करण्यात आला आहे. नामशेष होमिनिन आणि मानवी उत्क्रांतीच्या जनुकांशी (जीनोम) संबंधित शोधांसाठी त्यांना हा पुरस्कार देण्यात आला आहे. स्वांते पाबो (Svante Paabo) एक स्वीडिश अनुवंशशास्त्रज्ञ (Swedish geneticist) असून ते उत्क्रांती अनुवांशिकतेमध्ये तज्ज्ञ आहेत.

स्वांते पाबो यांनी निएंडरथल जीनोमवर मोठ्या प्रमाणावर काम केले आहे आणि यासाठीच त्यांना नोबेल पारितोषिक देण्याता आला आहेत. नोबेल समितीचे सचिव थॉमस पर्लमन यांनी कोरोलिंस्का इन्स्टिट्यूटमध्ये विजेत्याची घोषणा केली. “कोरोलिंस्का इन्स्टिट्यूटमधील नोबेल समितीने आज नामशेष होमिनिन आणि मानवी उत्क्रांतीच्या जनुकांशी संबंधित शोधांसाठी 2022 चे फिजियोलॉजी किंवा वैद्यकशास्त्रातील नोबेल पारितोषिक देण्याचा निर्णय घेतला आहे” असे नोबेल समितीने एका निवेदनात म्हटले आहे.

BREAKING NEWS:
The 2022 #NobelPrize in Physiology or Medicine has been awarded to Svante Pääbo “for his discoveries concerning the genomes of extinct hominins and human evolution.” pic.twitter.com/fGFYYnCO6J

— The Nobel Prize (@NobelPrize) October 3, 2022

स्वंते पाबो यांना त्यांच्या संशोधनात असे आढळून आले की नामशेष होमोनिन जनुके होमो सेपियन्समध्ये हस्तांतरित झाले होते. पाबो हे पॅलेओजेनेटिक्सच्या संस्थापकांपैकी एक असून त्यांनी निएंडरथल जीनोमवर मोठ्या प्रमाणावर काम केले आहे. जर्मनीतील लीपझिंग येथील मॅक्स प्लँक इन्स्टिट्यूट फॉर इव्होल्यूशनरी एन्थ्रोपोलॉजी येथे ते मँजेनेटिक्स विभागाचे संचालकही राहिले आहेत.

गेल्या वर्षी यांना मिळाला होता नोबेल

वैद्यकशास्त्रातील 2021 चा नोबेल पुरस्कार डेव्हिड ज्युलियस आणि आर्डेन पेटामूटियम यांना देण्यात आला होता. या दोन्ही संशोधकांना शरीराचे तापमान, दाब आणि वेदना या रिसेप्टर्सचा शोध लावल्याबद्दल हा पुरस्कार प्रदान करण्यात आला होता. हे दोन्ही नोबेल विजेते शास्त्रज्ञ अमेरिकन आहेत. डेव्हिड ज्युलियन हे कॅलिफोर्निया विद्यापीठात प्राध्यापक आहेत, तर आर्डेन पेटामूटियम हे अर्मेनियन वंशाचे अमेरिकन नागरिक आहेत आणि ते ला जोला येथील स्क्रिप्स इन्स्टिट्यूटमध्ये शास्त्रज्ञ आहेत.

नोबेल पुरस्कारांची घोषणा आजपासून सुरू

वैद्यकशास्त्रातील नोबेल पारितोषिकांसह नोबेल पुरस्कारांची घोषणा आजपासून सुरू झाली आहे. उद्या मंगळवारी भौतिकशास्त्र, बुधवारी रसायनशास्त्र आणि गुरुवारी साहित्य क्षेत्रातील हे पुरस्कार जाहीर केले जाणार आहेत. यंदाच्या नोबेल शांतता पुरस्काराची घोषणा शुक्रवारी होणार असून अर्थशास्त्र पुरस्काराची घोषणा 10 ऑक्टोबर रोजी होणार आहे.